A sgiucca di u pastori

Ghjattonu a écrit:O Ghjenti, v'aghju da cuntavvi un successu. Attenti, ùn hè una fola, asculteti bè è cuntetila à i vosci ziteddi, chì vali più chè tutti i galateia è i discorsa chì facia u tintu di Preti Nunziu:
Una volta, u babbu di Zi'Paulu III chì, soca, l’anziani com’è mè ùn ani nemmancu cunnisciutu si lamintaia è si lagnaia. A robba viva era in malavia è l’annu era gattivu. Tuttu u rughjonu era abbisistitu ed ancu i sgiò di Sartè è Campumoru a diciani : Quista a verraccia, quand’idda hà da compia? Ricchi è povari, i donni patiani è pienghjaiani, chì l’omini erani stati mandati nantu à u frontu, è issa verra ùn vulia finiscia mai. In paesi, ùn firmaiani chè l’anziani è i ziteddi troppu ghjovani par essa stati ingaghjati.
Un ghjornu, u tintu pastori fù à l’addisperu, quand'iddu s'abbadò chì li mancaia una sgiucca. I latri l’aiani scruchjatu una volta di più, pinsò. Un tempu passò è s’era sminticatu in tuttu di a sgiucca, quandu di bon’ ora, una mani d’aprili, trè ghjuvanotti pichjaroni à a porta di a so casedda.
- o Zì, semu vinuti da purtavvi sta sgiucca. Quidda ch’è vo’ eti persu, nanz'à Natali, l’emu presa no’, dissi u frateddu maiò. Babbu si n’hè andatu in issi Francii, ùn n’avemu manca nutizia, mamma hè sola cun noscu è ùn c’era più nudda à magnà.
-S’idda hè cusì, sta sgiucca hè a voscia, ùn la voddu. Tinetila ghjà, par piaceri, eti fatu bè, o zitè.
Ma i trè frateddi s’avvargugnaini di vultà in casa cù a sgiucca. Allora, accesini u fuconu, imbrucconi a sgiucca è a si magnoni tutti insemu, cun i dui famiddi aduniti.
Stu successu, mi l’hà contu Saveriu, u fiddolu di Paulu III. U fattu si stà chì in i tempa d’oghji chì ùn cunnoscini manca appena u bistracciu di nanzu, l’omini di valori com’è stu pastori ùn si vedini tantu. Si sarani piatti o sarani marsi! qual’hè chì a sà?